Os obxectivos xerais do ENL son potenciar o uso da lingua galega en todas as actividades da EOI, lograr unha valoración positiva do uso da lingua, e mellorar a competencia lingüística dos membros da EOI. De forma máis específica, saliéntanse a seguir algúns dos obxectivos concretos que se perseguen:

• Concienciar aos membros da EOI de Santiago da necesidade de continuar avanzando no proceso de normalización lingüística.
   
• Converter o galego na lingua de uso habitual en todos os comunicados e documentos oficiais redactados desde o equipo directivo e conseguir así mesmo que os departamentos didácticos se impliquen na consecución deste obxectivo.
   
• Galeguizar todo o sistema administrativo e informático do centro, así como todo tipo de carteis, anuncios e exposicións (tanto dentro como fóra das aulas).
   
• Promover a utilización do galego como lingua de relación habitual no centro para todos os membros da comunidade educativa.
   
• Converter o galego na lingua de uso habitual nos actos oficiais e públicos que se celebren no centro, ben sexan de carácter didáctico, ben de carácter lúdico.
   
• Instar a que o galego sexa a lingua de uso habitual nas reunións do consello escolar, claustros, xuntas de avaliación, xuntas de delegados, asociacións de alumnos ou ex-alumnos e todos aqueles órganos de decisión que teñan que ver coa comunidade escolar.
   
• Intentar superar prexuízos e actitudes lingüísticas negativas.
   
• Potenciar a presenza da realidade galega (cultura, historia, xeografía, economía, etnografía, literatura, arte, folclore, etc.) nas actividades da EOI.
   
• Ampliar coñecementos ao redor da lingua galega e as novas tecnoloxías.
   
• Desactivar os prexuízos lingüísticos que existen en contra do galego.