Renuncia á matricula
Antes de remata-lo mes de abril, o alumnado poderá renunciar
á matrícula cando concorran as seguintes circunstancias:
a) Enfermidade prolongada física ou psíquica que lle impida continua-los seus estudios.
b) Incorporación laboral.
c) Calquera outra circunstancia sobrevida no transcurso do curso escolar que,
a xuízo da Dirección, lle impida continua-los seus estudios.
Estas circunstancias xustificaranse documentalmente e, se non fose posible
a xustificación, irán acompañadas dun informe motivado
da Dirección que se incorporará ao expediente do alumno.
Traslado de expediente
O traslado de expediente por matrícula viva só será
aceptado cando exista xustificación suficiente, que acredite o traslado
de residencia familiar ou outras causas debidamente xustificadas e co informe
favorable da Inspección Educativa.
Poderá facerse traslado de expedientes durante todo o curso.
Se unha vez iniciadas as actividades lectivas se observase a non incorporación
ou a falta de asistencia continuada de determinados alumnos, a Dirección
dirixirase a eles para que expoñan por escrito, nun prazo de vintecatro
horas, as razóns do seu absentismo. Cando a xuízo da dirección
non exista causa xustificada da ausencia, esta recordaralles a súa obriga
de incorporarse inmediatamente ás actividades académicas do curso,
coa advertencia expresa de que, no caso de non producirse esta no prazo de dous
días lectivos contados a partir da data do recibo desa notificación,
procederase a realizar unha baixa de oficio. A súa praza será
adxudicada seguindo as relacións de solicitantes ordenadas segundo sorteo
e publicadas na súa data. Este procedemento deberá estar concluído
ó rematar o primeiro trimestre.
Como norma xeral, a ratio será de trinta alumnos por grupo excepto
no ciclo superior que será de vintecinco.
Non se poderán formar grupos con menos de vinte alumnos.
Non obstante coa finalidade de garantir a continuidade de estudos no
idioma correspondente, poderase autorizar un grupo por curso cunha ratio menor.
Calquera excepcionalidade que se aparte do establecido nos tres puntos
anteriores será autorizado expresamente polo servizo de Inspección
educativa.
